Heim í pólitíkina og dagleg störf.

Þá er ég loksins kominn heim aftur og farinn að fylgjast með pólitíkinni og kosningavinnunni, sem komin er á fullt skrið.  Fór á setningu landsfundar Sjálfstæðisflokksins, sem var óvenju glæsileg og ræða formannsins ein af þeim hófstilltari og betri sem ég hef heyrt.  Um leið og ég mætti gekk ég beint í fangið á pabba, Theodór bróður og Björgu.  Við settumst við borðið hjá norðaustur kjördæmi og létum eins og við værum enn búsett fyrir austan. Þarna var fullt af góðu fólki sem gaman var að hitta.

Náði að kíkja aðeins við á föstudaginn líka og notaði þann tíma til að heils upp á fjöldann allan af félögum og vinum.  Í mínum huga er einn mikilvægasti þáttur landsfundar Sjálfstæðismanna einmitt að hitta mann og annan og deila með þeim skoðunum sínum og framtíðarsýn.

Dagleg störf í fullum gangi. Námskeiðahald út og suður. Fór á laugardaginn austur í Skeiða og Gnúpverjahrepp þar sem Hótel Hekla er og var þar með námskeið fyrir Kaupþing (eitt af 800 stærstu fyrirtækjum heims!)